Mussar ed emprender en dus
Rumantsch è Vossa lingua e Vus vulais applitgar ed approfundar in’autra lingua? La Lia Rumantscha renda attent a la plattafurma E-TANDEM, la plattafurma naziunala per TANDEMs linguistics® dal Forum per la bilinguitad a Bienna. Grazia al sustegn da la Lia Rumantscha stat questa plattafurma a disposiziun era per rumantsch.
Co funcziuna l’emprender en in tandem? Duas persunas da differenta lingua furman in tandem linguistic e mussan lur lingua ina a l’autra. Quai succeda cun barattar alternantamain la rolla da mussar ed emprender. Chattai sin la plattafurma E-TANDEM ina persuna che vul emprender rumantsch e che po mussar a Vus la lingua che Vus vulais emprender u approfundar!
La purschida è gratuita e sa drizza a persunas maiorennas che abiteschan en Svizra. La finamira dal Forum per la bilinguitad è da promover la chapientscha orala en Svizra.