Per­fec­ziu­na­ment

 
mäsi_péz.jpg
 

Tgi che sa bain rumantsch, ha plirs avantatgs

Avais Vus ina incarica tar il chantun u tar ina vischnanca rumantscha u bilingua? Aspirais Vus ad ina plazza tar las medias rumantschas? Instruis Vus rumantsch u per rumantsch ad uffants u creschids? U avais Vus simplamain interess dad As perfecziunar en Vossa lingua materna, a bucca ed en scrit?

La Lia Rumantscha porscha curs da perfecziunament per Rumantschas e Rumantschs. Per in singul participant ubain per gruppas, en curs privats ubain publics, en tut ils idioms e rumantsch grischun. Per Voss avantatg e per avantatg da nossa lingua.

 
 

Grup­pas da gieu e ca­nor­tas

 
foti per affons-mäsi.jpg
 

Ils uffants èn l’avegnir

Saja quai la «gruppa da gö Mürina», la «gruppa da gieu Nanin» ubain la «canorta Villa Milla» – en las regiuns rumantschas datti numerusas gruppas da gieu ed er insaquantas canortas. Er a Turitg exista ina canorta rumantscha.

Per ch'ils uffants vegnian fits en la lingua rumantscha porscha la Lia Rumantscha il program da famiglia kidsfits. Cudeschs cun chanzuns, versins, portatuns e gieus, apps e filmins d'animaziun – tut quai ed anc dapli chattais Vus sin www.kidsfits.ch.

 
 

Scola rumantscha Turitg

 
20160903_110621.jpg
 

Noss pitschens ambassadurs en la Bassa

Vivais Vus ordaifer il chantun Grischun e discurris a chasa rumantsch cun Voss uffants? Quai è grondius. Quai è la promoziun la pli impurtanta per mantegnair il rumantsch. La Lia Rumantscha s'engascha per che Voss uffants possian era discurrer rumantsch cun auters uffants en lur vegliadetgna e per ch'els possian emprender da leger e scriver rumantsch.

Sin iniziativa da la Quarta Lingua ed en collavuraziun cun la Lia Rumantscha datti a Turitg dapi il 2014 in curs da lingua per uffants da geniturs rumantschs. Quel ha lieu mintgamai la mesemna suentermezdi da las 14.30 fin las 16.15 en la chasa da scola Hirschengraben. Il curs sa drizza ad uffants da l'emprim onn da scolina fin e cun la davosa classa dal stgalim superiur.

Igl è pussaivel d'entschaiver il curs da tut temp. Ils uffants pon prender part ad ina lecziun d'emprova.