Café rumantsch virtual
Vegni sin in café virtual!
Il café stuais far tez, per il bun discurs procura la Lia Rumantscha. Nus ans inscuntrain, discurrin e discussiunain regularmain davart ina tematica. Latiers bavain nus noss café e giudain 60 minutas rumantschas.
Gia passa 20 onns datti il Café rumantsch ... ed uss er online
Il Café rumantsch è in inscunter regular che dat la chaschun da discurrer rumantsch ad indigens, giasts e persunas novarrivadas che emprendan rumantsch. L’occurrenza è publica e la participaziun gratuita. Avant bundant ventg onns hai dà ils emprims Cafés rumantschs en Engiadina Bassa. En il fratemp vegnan quels realisads en tut las regiuns rumantschas e schizunt ordvart il chantun Grischun s’inscuntran Rumantschas e Rumantschs en il Café rumantsch.
Tuttenina po l’entir mund sa participar al Café rumantsch
Abitais Vus a Breil en Surselva ubain a Brail en Engiadina Bassa? U essas Vus ina da bleras Rumantschas u in da blers Rumantschs che vivan giu la Bassa? U abitais Vus schizunt en Brasilia?
Grazia al mund digital pudain nus tuttas e tuts ans inscuntrar sin in café e dar ina baterlada.
I dat per ordinari ina giada al mais Cafés rumantschs idiomatics online.
La colliaziun per As participar survegnis Vus suenter l’annunzia che Vus pudais far sco proxim pass. Attenziun: ils plazs per ils Cafés rumantschs virtuals èn limitads. Spetgai pia anc da laschar or il café e S’annunziai l’emprim per ina da las occurrenzas.